MANGKULING GIRINGGIRING

"Kota, kota, jalan Sutomo... "
"Tiit.... Tiit... Tudia do hamu, dohot do hamuna? "
Tarjolma ahu na sai pantom di topi ni dalan kuli i maranganangan paimahon motor angkot.

"Daong lae" sogo rohangku dibahen kaleksonna i. Lintun, tarsesa jadina tabo ni namarnatal uju dakdanak. Olat ni na mandok liturgi na pajojorhon tu jolo i do pe mamolus nangkaning. Di lambungku tahe si Panabari halak na jogi sian haetehonna. 

Hatongamon i hira naung diboan tubu do huroha ate. "Boasa?" husungkun diringku. Dang taralusi ahu songon sungkun sungkun ni donganhu boasa tanggal 25 Desember marnatal ninna. "Oto ma ho? "
Dipaloak si Ganda ahu ala dang hualusi. "Ima ari hatutubu ni Jesus sipalua" ninna ibana manolukhon alus na tung mansai mura didok rohana.

Dung mamolus angkot i, tubu holsongku. Lam holom ari dang adong be mamolus motor angkot.
"Trip terakhir" somalna songoni do sise ni supir manggora songon boaboa.
"Dang toho be on" hualusi diringku di bagasan roha jala lam tamba holom ari di Siantar nabalau.

Hununuti ma mardalan, atik boha dang adong be motor mamolus. Longa hundulan lapo tuak, suman holan Inanta dohot Amantana i do hundul paimahon tamue parmitu. Somalna ribur do minum disi. "Langa ma huta on, tudia be do naeng angka jolma?" songoni ma ra angan angan ni inanta parlapo i, sarupa tu nahupingkiri. Dung hubolus lapo i holip ma sude taringot huta on.

"Panabari!!?" soluk ro muse jolma natongam i tu pingkiranku. Sude tahe sai ibana do juara sada. Rangking sada di singkola, juara dungdang muse. Holan tammat sian parsingkolaan pintor dijalo di parkarejoan najogi. Gabe kapala perusahaan bank suasta. Burju ni namardongan, ditogihon ahu karejo. Bagian 'debt colector' ahu dibahen managi angka parutang busuk. Ingkon marlambas roha do martagi, marragam sidalian ni parutang on.

"Bangkrut boniaganami" ninna nadeba.
"Nga lintun Amantangku, sabar hamuna da, hugarar pe singirnami i" ninna Inanta i asa unang dipalaho nasida, sian ruma naung dipasindorhon i.
"Boha huroha molo dang hugarar?" dipolgak sada Amanta ahu, nabalga botohonna.
Sandok marragam ma tahe, songon parragam ni houm nihalak di Kota Jakarta i.

Parbiar do ahu, alai dijujui parkarejoon i do ahu gabe halak na hum. "Molo dang manggarari angka namarutang i sian dia do gajim?" disonggaki hami na sakantor uju ro 'bos besar' mamareso paretongan hepeng. "Gok ma parutang busuk on? dang tolap be hamu martagi?" gabe dohot si Panabari mamuruki hami dung mulak bos besar i.
Unduk jala tungki be ma hami agia so mandok aha.

"Daong, tanda tangani Inangma" ningku mamboan surat asa dipakosong Inanta i jabu na dipasindorhonna i.
"Ua asi ma roham ale" marsomba Inanta i.
"Daong Inang, tutup buku hami, nga sataon so margarar hamuna." hupabalga soarangku so tung tartait ahu annon marasi roha.
"Sombanghu ale...." marsinggang di simanjojakhu Inanta i.
"Daong.... hupaeret pathu" na ro do ulaning parenta ni kaisar Romawi i tu pingkiranku songon parenta na ingkon pamateon angka posoposo nabaru sorang?

Nunga sap tariluilu Inanta i, anakhonna pe marsuraki tangis. Tolu gellengna jala etek etek do pe. Gok ma ro jolma mainondur, diballaballa i natorop i ahu. "Ginjang ma roham, lak so asi roham? " ninna Amanta namatua.

"Olo do hamu Amang manggarar?" huasangi amanta i.
"Oi... hubondut do annon ho" diondihon sahalak baoa naposo Amanta namatua i.
"Aha nimmu? Bondut ma" hu asang i muse.

Halak nabolon baoa i songon 'pemain smackdown' hira sahorong pardagingonnami tu sipartagi on.
Leleng hami marbada munsung songon inaina, haruar ma angka hata rorang, ditangging sahat tu urat nirungkung asa simonang. Mohop ma sipareon, mohop nang ateate. Masidorongan badan ma sahat tu namartenju. Hulotak uluna, dibalbal tanggurunghu. Marmudari igungna nahutumbuk i, dibuat ibana balati naeng ditiham ahu alai huelakhon. Dang tarjua ahu be parbadaan on, hurampas balatina i laos huonjomhon tu andorana.
Diroro sahuta ahu, lintun ahu mangaliung. Marlojong, salojongna, hutimbung binanga asa malua ahu.

Mabiar ahu manopot si Panabari, maporus ahu marmotor sahat tu Siantar. Maisolat tu jabu ni donganhu si Ganda nama ahu didok rohangku.
Burju do si Ganda tahe.
Ponjot andorangku hinorhon hinalungun. 

"Boasa ma apala tingki Natal on ro sisongonon?" Hape tahingku naeng mulak tu huta hatubuan hian do manopot Inong naung matua i. Lehononku hian ma sipalas nirohana.

Holan ro Inonghu tu pingkiranku na mardalan i, mangkuling giringgiring di palas ni gareja bolon. Dan sadia leleng tarbege marende di bagas joro i.
"Na sian ginjang do ahu ro, Barita las ni roha do, huhut nauli situtu, huboan tu sude hamu."

Ro ahu mamboan barita hamamago do. Hubaranihon manjonoki gareja bolon i, maningkir ahu sian janjelana. Jongjong pitu halak jonok langgatan mamboan lilin naung galak. Diintopi palito ni gareja i asa holom, marende "Sonang ni borngin na i" angon tarbege didongani hesek dohot sulim. Mardalan sipitu halak i manjonoki ruas natindang di bangkuna be mangalehon api tu lilin na di tanganna asa galak.

Lam madetuk ahu, huingot uju dakdanak. Sonari nga dao ahu tahe. Mandao. 

"Tu bagas hamu, unang maningkaningka" songgot ro sahalak Ama namarpahean juba. Sintua do huida i.
Hutadinghon inganan i jadina, mabiar ahu maradophon ibana. Hupadalan ma muse tu jabu ni si Ganda, tolu batuna i sahat nama. Laos so adong do tahe motor dohot kareta na boi situmpangon. Sahat ahu tu jabu ni si Ganda alai kosong jabuna.

"Tudia halakon Ito?" hubaranihon manise anak boru hombar jabuna. Topet manonton barita ibana. 

"Ito... " huulahi... 

Gabe humordit ibana " aha Ito? ise hamuna? " ninna manundali tipi i mangida ahu. 

"Didia parjabu on? donganna do ahu" ningku mandok jabu ni si Ganda.
Tingki mangalusi sungkun sungkunhi ibana huida di tipi i mamolus adong songon lumba asa dipaboa tu Polisi halak na digombaran i ala mamunu. "Gombarhu" narohangku gabe lintun ahu manadinghon itoan i.

Hupasamak ma diringku asa unang ditanda halak, agia pe dung borngin dang pola ditanda jolma i ahu nian. Hupahojot langkangku alai dang huboto be tudia agoanhu. Mangkuling giringgiring, hubege tae di sipareonku. Hira nipi, soadong gareja huida na jonok alai lam gogo saringar ni giringgiring i. Hudiori, hutopot soara i. Jumpanghu gareja i laos hujonoki. 

"Aha namasa Amang?" ningku tu pamalu giringgiring i. 

"Nga ro bangke ni si Bongka, hona bunu ibana di Jakarta." ninna amanta i.
Gabe maoto panghilalaanku, "atik nahubunu i do i?"

"Amang....." humitir ahu mandok hatangku.
Lambas ma tahe roha ni Amanta sipalu giringgiring i mangapoi ahu jala dipoda i ahu dung hupaboa barita hagogotanhi tu ibana. Pandita do hape amang i. Hupangido marborngin di palaspalas i ahu modom jonokhon giringgiring i. Hujangkit tu ginjang laos husolsoli sude pangalahongku disi.

Sogotna i hudohoti Amang Pandita i, diboan ahu tu inganan na mate i. Toho... nahubunu i do i.
Natuatua ni namate i mansai tungki huida, gale, gete nang rohana. Mangandung bolon Omakna i dung ditaruhon si Bongka i tu inganan parsatongkinon i.

Dung sae sian udean i dipataru Pandita i ma ahu tu kantor Polisi laos ditonahon na ingkon parbarita nauli ahu haduan dung haruar sian hurungan.
****

"Nunga tubu Sipalua" marsaringar ahu sian langgatan jamita dung Pandita ahu.

TORSA/CERITA ini merupakan karya tulis Harkit M Sihombing yang ikut lomba menulis berbahasa Batak dengan tema Natal pada tahun 2017 di Facebook GROUP PALAMBABOK PUSU-PUSU dan peraih juara 3.

Isi cerita, tempat dan tokoh dalam TORSA ini merupakan FIKTIF (TIDAK BENAR TERJADI).
HORAS!